Svona biðurðu gervigreind um hjálp

Gervigreind svarar því sem þú skrifar, ekki því sem þú átt við. Því skýrari sem beiðnin er, því betra verður svarið.

Beiðnin sem þú skrifar í spjallgluggann kallast oft prompt á ensku. Hér köllum við hana bara beiðni. Þessi ráð eiga við um flest spjallforrit með gervigreind.

Skref fyrir skref

1. Segðu frá samhenginu. Gervigreindin veit ekkert um þig eða fyrirtækið þitt. Segðu hver þú ert og um hvað málið snýst, til dæmis: „Ég rek lítið bakarí á Akureyri.“
2. Segðu hver á að lesa textann. Póstur til birgis hljómar öðruvísi en færsla fyrir viðskiptavini á samfélagsmiðlum. Segðu líka á hvaða tungumáli textinn á að vera.
3. Gefðu dæmi. Ef þú átt texta sem þér líkar skaltu líma hann inn og biðja um eitthvað í svipuðum stíl. Eitt dæmi segir oft meira en löng lýsing.
4. Biddu um ákveðið form. Segðu hvað textinn á að vera langur og hvernig hann á að líta út, til dæmis „þrjár stuttar málsgreinar“ eða „listi með fimm atriðum“.
5. Lestu svarið yfir. Gervigreind getur haft rangt fyrir sér og gert villur í íslensku. Athugaðu sérstaklega tölur, nöfn og dagsetningar. Ef svarið er ekki nógu gott skaltu segja hvað þarf að laga og biðja um nýja útgáfu.
6. Slepptu viðkvæmum upplýsingum. Settu aldrei kennitölur, launatölur, heilsufarsupplýsingar eða annað persónulegt um viðskiptavini eða starfsfólk inn í ókeypis forrit sem eru opin öllum. Þú veist ekki alltaf hvar gögnin lenda eða hvort þau eru notuð til að þjálfa gervigreindina.

Dæmi: fyrir og eftir

Svona beiðni skilar yfirleitt almennu og flötu svari:

Skrifaðu tölvupóst um seinkun.

Þessi skilar mun betra svari:

Ég rek lítið bakarí á Akureyri. Tertupöntun fyrir fermingarveislu tefst um einn dag af því að hveitið kom ekki á réttum tíma.

Skrifaðu stuttan og hlýlegan tölvupóst á íslensku til viðskiptavinarins. Biðstu afsökunar, segðu hvenær terturnar verða tilbúnar og bjóddu afslátt af næstu pöntun.

Hafðu póstinn styttri en 100 orð og þúaðu viðskiptavininn.

Í seinni beiðninni veit gervigreindin hver skrifar, hvað gerðist, hver á að lesa og hvernig textinn á að vera. Hún þarf ekki að giska.

Lestu samt svarið yfir áður en þú sendir það. Þú berð ábyrgð á því sem fer frá þér, ekki gervigreindin.

Þegar svarið hittir ekki í mark

Stundum verður svarið samt ekki eins og þú vildir. Þá er oft fljótlegra að halda áfram í sama spjalli en að byrja upp á nýtt. Skrifaðu til dæmis „styttu þetta um helming“ eða „þetta er of formlegt, skrifaðu eins og þú sért að tala við nágranna“. Gervigreindin man það sem á undan fór í sama spjalli.

Ef þú vilt aðstoð við að nýta gervigreind í daglegum verkum geturðu haft samband.